Liedeken op de wijse, Je diroy si i'osoye. etc.
OM dat Saul verbrack Gods weerde mandaet, Werdt hy berooft van Sinnen, In hem was ghegaen den boosen vyant quaet, En werdt onstelt van binnen: Dauid wt minnen Heeft met spe van sijnder Snaren, Den boosen woed cunnen verwinnen, En Saul int beswaren Willen bystaen, en bewaren.
By Saulem moghen wy alle verstaen Den eersten Uader onvroet, Die ieuchdelick was ghestelt van t'Godlick graen In weeldighe daghen soet: Saul niet zeer goet Misbruycte t'Rijcke excellent, Insghelijcx oock dan al metter spoet, Deur d'ingheuen van t'Serpent, Quam Adam in druck, en torment.
Saul werdt berooft van sijn Heerschappe, Deur t'svyants loose vonden, Sghelijckx Adam, als hy sette aen d'sye Godts Ghebot, viel in Sonden, En lach ghebonden, Uan alle Gods gauen berooft, Ghequetst met bitterlijcke wonden, Hy en ware niet verdooft, Had hy Liefde niet afgheslooft.
Saul dus zijnde van Sinnen gheheel onstelt, En wiste tsijnder vrame, Troost noch hulpe, dies bleef hy zeer ghequelt, En de Dienaers bequame, Uan hoogher fame, Hebben hem haest Raedt ghegheuen, Wy weten eenen aenghename, Sterck ter Wapen verheuen, Deur sijn hulpe suldy leuen.
Dees Dienaers, zijn Uast betrouwen, Ghelooue, en Hope mede, Sy wecken Adam wt sijn benouwen, Tot Liefde, Pays en Urede, En gaen ter stede Uan Dauid, dats tot Christum siet, Roepende deur menighe Bede, Dat hy niet int swaer verdriet En late, d'welck hy schiep van niet.
Dauid es commen tot Saul triumphant, Mebringhende sijn Snaerspel, En heeft ghespeelt met sijn vinghers playsant, Slaeckende soo sijnen Druck fel, Deur sijn Harpe snel, Soo dat hy werdt verconsolazeert, Dauid quam in sijn behaghen wel, Hy had' hem gheconsoleert, Die te voren was ghevexeert.
Christus Gods Sone latende sijn Rijcke, Is ter Eerden neder ghedaelt,
En aennemende Uorme menschelijcke, Met heeter Minnen deurstraelt, Is met ons ghepaelt, Bringhende een Harpe, dats t'Cruycen hout, De Snaerkens gaen zeer net onghefaelt, Maet' houwende menichfout, D'welck den Uyandt eeuwelick rout.
Cookies on Poetry Cove