Refereynen ende liedekens

§ Liedeken op de wijse,Ick erm schaep aen ghene groen heyde.

SIjt vroet, wijs, en voordachtich, Ghy Princen alle ghemeyn, Het Quaet weest doch verplachtich Uan Auaricy reyn: U Landt regeert met minnen, Aensiet den tijt // dinckt wy ghy zijt, Uwen roep wilt wel bekinnen.

Ghy Heeren wilt wel ghebieden, In uwen hooghen Staet, Eyghen bate moet ghy vlieden, En Wreedtheyt fel en quaet, Doet v last met rijpen Sinnen, Aensiet den tijt, dinckt wie ghy zijt, Uwen roep wilt wel bekinnen.

Peyst hoe ghy sult staen beuen, Uoorden oppersten Regent, En Rekeninghe gheuen Uan al v onderwent Uoor Santen en Santinnen: Aensiet den tijt // dinckt wie ghy zijt, Uwen roep wilt wel bekinnen.

God heeft v willen stellen Als Uaders ouer de Lien, En laet v Uolck niet quellen, D'Onrust moet ghy verbien, Wilt ghy tslants Ruste winnen: Aensiet den tijt // dinckt wie ghy zijt, Uwen roep wilt wel bekinnen.

Ghy Ledekens alle ghemeene, Obediert v Hoofden wel, Haer beuel tzij groot oft cleene, En valt doch niet rebel Tslants Ruste sal beghinnen, Aensiet den tijt // dinckt wie ghy zijt, Uwen roep wilt wel bekinnen.

Het Hooft dat moet beuelen

T'Ledt moet ghehoorsaem zijn, Dit hoortmen Paulum quelen Des Hemels nachtegael fijn, Merckt dit int herte binnen: Aensiet den tijt // dinckt wy ghy zijt, Uwen roep wilt wel bekinnen.

Dat Ruste nu is verdreuen, De cause wel deursiet, T'compt deur ons onvroet leuen, Wy en kennen ons seluen niet, Noch Urienden noch Uriendinnen, Aensiet den tijt // dinckt wie ghy zijt, Uwen roep wil wel bekinnen.

Ghy Princen t'allen termijne, U Landen houdt gherust, Gherust zij elck in tsijne, Onrust wert haest gheblust, Uerjaecht dees twistighe spinnen: Aensiet den tijt // dinckt wie ghy zijt, Uwen roep wilt wel bekinnen.