§ Liedeken op den .xxic. Psalm,Domine in virtute tua, &c.
NU sal zijn bly // Ons Coninck Heer, al deur v groote Cracht, Want alleen ghy, Hebt sijn begheerte nu volbracht, Nu verwont hy, De ghene die hem waren teghen, Ghy stont hem by, Ghy liet hem niet verleghen, Heel gheneghen Tot sijn begheerte men v aenschout, Hy heeft ghecreghen U Gauen groot, en menichfout, Ende de Croon van het beste Gout, Het Leuen nv, Creech hy van v, Het welck gheen eyndt en neemt met heur die ghy behout.
Ghy hebt hem zeer, Deur uwe toedoen nu begaeft:
Aen Prijs en Eer, Cost hy deur v gheraken, [Noch sal hy meer] [Werden van v al hier ghelaeft:] Ghy sult hem Heer U Liberalicheyt hier laten smaken, En hem maken Uerheucht deur uwe claer aenschijn soet Sijn Hop' en Saken Stelt hy op v O Heere goet: Daerom vergaet niet sijnen veurspoet. O Coninck vailiant, U stercke Hant, Sal hem wel vinden die v spijt aendoet.
Ghy sultse hier Doen gloeyen als een Backers ouen: Die daer met vier Onsteken is van binnen, Als ghy nu schier U Gramschap toont van bouen. [Quade manier] Sult ghy toornich te vernielen beghinnen, Heur tsvruchts winnen Werdt gheroeyt hoe schoon dat opgaet: En diet versinnen En sullen niet meer sien heur Saet: Want elck wou v betijden met quaet, Neerstich en cloeck, Deden sy versoeck, Maer sy en mochten niet volbringhen de Daet.
Ghy sultse van Den anderen afscheyden, Ende als dan, Soo sal haer aensichte ghenieten, Uoor alle man, Dat ghy heur wout bereyden, Want v Macht can, Als inden Doel met Pijlen daer na schieten, [Deur t'verdrieten,] Laet Heer v macht dan nu rijsen: Die v verlieten, Wilt hier v Cracht bewijsen: Soo sullen wy ons verjolijsen, U Lof singhen // [van Ureucht opspringhen] Ende met Liedekens v Moghentheyt prijsen.
Cookies on Poetry Cove