§ Prince.
Daer Wijsheyt is, daer is Ootmoedicheyt present,
Seyt Salomon, die de Wijsheyt was ghegheuen,
Maer daer hooueerdicheyt is tmoet elck zijn bekent,
Daer is Laster en Onrust bouen schreuen,
Met den hooueerdighen, wordt Twist verheuen,
Maer d'oprechte Wijse doen alle dinck met Raet,
In Rechtueerdicheyt, sullen die Wijse leuen,
Daer Wijsheyt, en Rechtueerdicheyt is delicaet,
Daer moet vlien alle Tweedracht, Twist, en haet,
Want die wijs van herten is ontfangt Gods gebot,
En doet die Rechtueerdicheyt, in alle sijn daet,
Hy is oock onderdanich naer dbeuel van Godt,
Daer den hooueerdighen weerspannighen Sodt,
Met Hoomoedicheyt, scheurt der Liefden bant,
En stellet in Onrust, soo datter elck met spodt
Daer bringt d'Ootmoedighe Wijse Rust abondant,
Wijsheyt met rechtueerdicheyt houdt in rusten d'lant.