Tshertoghenbossche. In viericheyt groeyende. Dominus prouidebit.
WIjsheyt is beter dan Cracht, so Salomon seyt, En een voorsichtich Man met goet bescheyt, Is oock beter, dan een die sterck is van leuen, Hier om ghy Coninghen, hoort met neersticheyt En verstaet ghy Rechters, wat de Schrift wtleyt, Wilt ghy d'Landt in Rusten houden verheuen: Want v is macht vanden Heere ghegheuen Het Landt te regeren met Wijsheyt playsant, Staet na haer, ondersoectse, soot staet gheschreuen, Ghy alle die Ouerste zijt des volckx, want Ist dat ghyse lief hebt, soo sal v verstant
De gheschicktheyt des Eertrijckx, wel connen weten, Waer deur ghy Ruste, sult brenghen in d'Lant Die de Liefde baert, door Gods cracht onghemeten, Dus solueer ickt Broeders hier nu gheseten, Dat de Landen meest houdt in Rusten ghemeene, Wijsheyt, die deur Godts Gheest, regeert alleene.
Moyses beual de Wet in Gherechtichede De Erffenisse den Huyse Iacobs mede, En de Beloften zijn Israel gheschiet: Hy heeft Dauid sijnen knecht gheset in Urede, D'alder sterckste Coninck, die na s'Wijsheyts Sede Israel regeerde in Godts Gheboden, siet, Ghy die de Landen dan regeert, vaer dit bediet, En draeght haerder sorghe deur Wijsheyt ghepresen, Wilt v seluen gheensins verheffen niet: Maer als een wt haer, wilt onder hen wesen. In als onderhoudt Godts Gheboden in desen, Soo en sal de Liefd' onder v niet vercouwen, Want daer staet gheschreuen alsoo wy lesen, Dat de Liefde alle Tweedracht doet schouwen, Dies ic my noch aen mijn eerst propoost moet houwen Dat meest d'Lant in Rusten hout, en helpt wt weene Wijsheyt, die deur Godts Gheest, regeert alleene.
Een wijs Rechter sal sijn volck deur Godts gheest saen Oordelen, dies sijn Heerschappije blijft staen, Want Godt is sijn verstant met Wijsheyt voeyende. Nae dat de Rechter des volcx is, hoort dit vermaen, Insgheljicx zijn oock sijn dienaers ghedaen, Soo een yeghelijck wel is bevroeyende,
Ghelijck een Regeerder der Stadt is groeyende, Soo werden d'Inwoonders oock altijt beuonden, Een onwijs Coninck sal hem zijn spoeyende Sijn Landen te bederuen tot allen stonden: Maer daer de wijsheyt met Gods Geest is verbonden, Daer siet men d'Landt in Rusten triumpheeren, Den Uoorspoet werdt haer van Godt ghesonden, Om datsy alleen sijn Ghenade eeren, Niemant en kennen sy dan den Heer der Heeren, Dies haer in Rusten houdt haer Landen reene, Wijsheyt, die deur Godts Gheest, regeert alleene.
Cookies on Poetry Cove