Wijngaertrancke tot Berchem. Niet sonder Godt. Conste bemin ick.
HOe onghestadich is d'Lant ter Werelt wijt, D'een is ghierich, hooueerdich in sijnder tijt,
Met Ongherechticheyt ten mach haer niet baten, Muyterije maken ouer d'Lant een groote strijdt, Metten cortsten in alle boosheyt voorwaren, Oorloghe, Dierte, Sterfte in alle straten, Sijn Onsalicheyt en is niet om volschrijuen, Noch min des s'Lants Salicheyts en Staten, Maer d'Landt dat in Rust en in vrede wil blijuen, Moet alleene Godts Wijsheyt aenclijuen, En sijn eyghen Uernuftheyt gaen te buyten wel: Want wanneer hy slapen sal nae des doots gherijuen, Soo en sal hy niet met hem draghen dan ghequel, Ghelijck die Rijcke Ureck dede, wiens siele snel Nae die doot begrauen wordt in d'eewich vertreden, Laet v Ghiericheyt varen, leeft nae Godts Beuel, Wijsheyt van de Landen best houden in Ureden.
Ghelijck de Sonne die Mane te bouen gaet, Soo canmen deur de Wijsheyt des Heeren raet, De Landen best houden in Ureden goet, Uant sy is Moeder der Liefden, sy en werckt gheen quaet, In haer is Gratie deur haer Liefde soet, Urede can sy maken, sy en stort gheen bloet, Sy maeckt Eendrachticheyt in de Landen bekent, Want sy regeret d'Lant met een Goddelijck spoet, Met die Waerheyt can syse verlichten present, Want sonder de Wijsheyt blijuen de Landen gheschent, Sy is een Gaue Godts den menschen ghegheuen, Om te ghebruyckene wt Liefden ghewent, Tot s'Menschen Salicheyt niet meer te sneuen, Want sy is een Goddelijcke Schat verheuen, Een Sleutel des Ureedts met Goddelijcke Seden,
Uanden heylighen Gheest ghecomen beneuen, Wijsheyt can de Landen best houden in Ureden.
Die Wijsheyt gheeft God wt Liefden alleene, Deur Wijsheyt compt kennisse en anders gheene: Want Salomon badt God om Wijsheyts gronde, Beter is sy dan Peerlen oft Gout zeer reene, Gheenen beteren Schat int swerelts ronde Dan Wijsheyt van Godt ghegunt wt sijnen monde, Ons tot een Leere om des slants verstercken: Dus bidt om Wijsheyt tot elcken stonde, Soo blijft ghy in Rusten in alle percken, Haer weghen zijn deuchdelijck en goede wercken: Want sy bewaert in Ruste, in Urede d'Lant, En maeckt den menschen tot wijse Clercken, Waer deur sy ghebruycken een Goddelijck verstant, Haer naesten beschermt sy deur Gods crachtige hant, Deur Godts Wijsheyt in Landen, in Steden, Gheen beter Solutie dan dese, want Wijsheyt can de Landen best houden in Ureden.
Cookies on Poetry Cove