§ Liedeken op de wijse, My lief is my onlancx ontweken. &c.
UErsint ghy Gheestkens alle ghelijcke, En wilt niet wesen zeer obstinaet, Regiert v wel, Erm ende Rijcke, En wilt volghen des Wijse mans Raet, En leert Wijsheyt zeer delicaet, Soo sult ghy vinden goede Ruste, Deur Wijsheyt reyn, Deur Wijsheyt reyn, Die allen Haet oyt bluste.
Aenmerckt doch wel des Werelts treken, Die heel vol boosheyt is gheplandt, Sticht Ure, wilt altijts Wijsheyt spreken, Sy is ghedaelt van Godts Rechter handt: Wijsheyt is een ghetrouwen Pandt, Soo Christus seluer heeft gheleert, Dus zijt doch wijs, Dus zijt doch wijs, En alle boosheyt van v keert.
Haer Uruchten goet die zijn Lanck leuen, Sy is ghetrouwe al sonder vaer, Goet ende Schat can sy v gheuen, Den Bedruckten troost sy oock voorwaer, Die Wijsheyt soeckt verre of naer:
Bidtse van Godt, hy is alleene Haren Gheuer goet, Haren Gheuer goet, Die bringt wt alle Weene.
Ouerdinckt doch ghi ionghe spruyten Die Wijsheyt ende haer oock bemint, Twist en discoort die sluyt sy buyten, Sy is ghetrouwe, en elck zeer vrint, Diese Godt den Heer int herte sint, Die is bevrijt van alle qualen, Dus zijt verheucht, Dus zijt verheucht Deur haer, in alle palen.
De Wijsheyt goet, die gheeft te loone, Die haer bemint ende wel vseert, Uerciersel net op thooft een Croone, Waer deur datmen zeer triumpheert, Haer wercken onghecorrumpeert, Die zijn elcken zeer aenghename, Dus ist wel recht, Dus ist wel recht, Dat sy heeft groote fame.
De Wijsheyt raet een elck tot Eere, Sy doet verdrijuen allen Twist, Sy is bekent by Godt den Heere, In haer en is gheen Arghelist, Wie anders doet hy heeft ghemist, En heeft verlaten die Fonteyne, Uol alder deucht, Uol alder deucht, Int s'Werelts pleyne.
Godts Ureese goet, soo staet gheschreuen, Die is d'Beghintsel en t'Fundament Uan die Wijsheyt hooghe verheuen, Die elcken maeckt zeer diligent, Sy is voorwaer een goet present, Beleeft, en sy can oock verdraghen, Alle Oproer, Alle Oproer Doet sy veriaghen.
Cookies on Poetry Cove