Barbara, per Aelst. Niet hebben is verdriet.
GHy gheslachten der Menschen nu in vigeure, Uerwerret int t'Ghelooue, dwelck v doet leuen, Wat gaet v ouere, wat hebdy veure? Dat ghy persisteert in sulck erreure, Gaende te buyten Godts Gheboden verheuen,
Moysen ghegheuen, Sonder eenich beuen, Wt Charitaten: Dinckt dat Abraham gheloouich is bleuen, En tot Rechtveerdicheyt ist hem gheschreuen, Uoor God beseuen, Urij onuerdreuen, Alsoo wy vaten: Moyses t'Ghelooue oock niet en wilde laten, Maer heeft daer voren ghestreden zeer fijn, Pharaos onghelooue willende haten, Als gheheel verwaten // t'eewighen termijn, Want deur t'Ghelooue elck mach salich zijn, Elck Lant in Rusten dwelck hout onghecorrumpeert, T'Ghelooue op Christum wel sterck ghefundeert.
Dauid noch zijnde ionck van iaren, Heeft op Christum reyn sijn Ghelooue ghestelt, Doen hy Goliam sonder veruaren, Die hen allen meynde te commen beswaren, Pijnde te wederstane zeer cloeck int velt, Niet met groot ghewelt, Soo t'Boeck Regum vertelt, Int seuenthienste claer: Iosaphat sijnen volcke heeft ghespelt, Ghelooft in uwen Godt en v tot hem helt, En acht Siluer noch Ghelt, U s'vyants macht smelt, Dus en hebt gheen vaer, Gheluck en voorspoet crijcht ghy voorwaer, Waer ghy zijt commende, ia in wat plecken,
En wilt niet vreesen, ducht vry niet en haer, Want t'Ghelooue eenpaer // waer ghy wilt trecken, Can Pays en Liefde in elck Landt verwecken, Dus can dan paysieren de Landen verturbeert, T'Ghelooue op Christum wel sterck ghefundeert.
In Aza groot Ghelooue ghebleken Segghende totten Heere met woorden sachtich, By v O Heere moet ick wtspreken, En is differentie maenden noch weken, Oft ghyer vele oft luttel helpt crachtich, Dit merck ick warachtich, O Godt almachtich Niet om vol prijsen, Wie in v ghelooft maeckt ghy deelachtich Uwer Bermherticheyt, O Godt eendrachtich, Aen wien ick clachtich Met Sinnen voordachtich Nae Dauids bewijsen, Roepende ick ben met groot verjolijsen, Wilt Heere uwen knecht dijn Weghen leeren, Met uwer Gracien van reynder ghijsen, Wilt my toch spijsen // teghen tsvyants verseeren, Sterckt mijn ghelooue O Heere der Heeren, Want den Landen alleene Ruste genereert T'Ghelooue op Christum wel sterck ghefundeert.
Cookies on Poetry Cove