§ Marien Cransken tot Bruessele. In alle tijt Wesel.
GOdt Adam int Paradijs stellende soet, Maecte hem d'Ouerheyt van sijn Maecsel goet, En gaf hem een Gebot (om sijn verfraeyen) Der Ghehoorsaemheyt, daer hy door sou leuen vroet In Rusten, maer saen brack hijt met staeyen, Door sijn Ongehoorsaemheyt, quaet van beraeyen, Dies moest hy smaken, naer schrifts getuyghen claer, Groote Onrusten, hier met moest hy hem paeyen In vremde landen: d'welck ons sijn saet, daer Heeft ghebrocht, tot eewighe Onrust voorwaer, Daer wy gheen Ruste costen vinden onbeschaemt, Dan alleene, door eens Menschen (openbaer) Ghehoorsaemheyt, de welcke d'Ouerheyt vernaemt,
Heeft inneghestelt, tot straffinghe, befaemt Den Ongehoorsamighen: waer door (sonder spot) Men de Landen can houden in Rusten versaemt, Als d'Ouerheyt ghehoorsaem is Godts Ghebot.
Dus d'Ouerheyt gehoorsaem Godts gebot machtich, Leuen de landen in Rusten eendrachtich, Want sy en zijn anders niet doende goet noch quaet, Dan Godt selue en beueelt warachtich, Als Coninck Aza, en Ioas delicaet, Die anders niet dna ghehoorsamighe daet En deden, waer door Godt haer verleende wel Rust en Urede in allen haer Landen ornaet: Dus wilt toch voor haer bidden naer Godts beuel, Ghehoorsaemheyt, Eere, is men sonder wtstel, Tol, Schattinghe, en Tribuyt, naer haer bede, Haer schuldich: diet wil wederstaen, zijnde rebel, Wederstaet Godts Gebot: siet t'sweert is haer te stede Gegheuen van Godt, tot wrake, niet tot vrede Des quaetdoenders: maer den goeden een salich lot, Dus houdtse de landen in Rusten hier mede, Als d'Ouerheyt ghehoorsaem is Godts Ghebot.
Maer als d'Ouerheyt leeft naer svleeschs begheren En door boosheyt Godts Ghebot contrarieren, Mits d'Onghehoorsaemheyt tot elcken termijne, Sulck Landt naeckt Onrust, sonder faelgieren, Tblijckt aen Pharao, diemen sach smaken den brijne Int Zee, en in groot Onrust quamen sijn landen, Door sijn Ongehoorsaemheyt, wreet van aenschijne: Tsghelijckx door Israel (tsy haerder schanden)
Misdaet, worden gheleuert haer vyanden, Cause van dien, was d'Onghehoorsaemheyt: Tsghelijckx Dauid, oock Salomon die vaillanden Deden Ongehoorsaemheyt, waer door saen was bereyt Grooten twist, en Onrust: maer diet tselue feyt Uerlaten hebben, volghende d'Beuel van Godt, Dan quamen de Landen in Rusten onghescheyt Als d'Ouerheyt ghehoorsaem is Godts Ghebodt.
Cookies on Poetry Cove