§ Prince.
Die op Menschen betrout al heeft hi rijckdom groot,
Is met veel Onvreden en Twisten gheplaecht,
Nemmermeer gherust, onsalich en bloot,
Altijt becommert, in t'Herte versaecht,
Uluchtende doer vreese, eer hem yemant iaecht:
Maer die in Godt haer betrouwen stellen claer,
Haer en faelgeert niet, God voor haer sorghe draecht:
Want als den benauden Tijt openbaer
De andere bedroeft, en quelt met hongher swaer,
Soo sullen sy lieflijck versaedt worden schier,
In als haer verblijdende vrij sonder vaer,
Elcken Liefde thoonende, is al haer bestier,
Groeyende in Deuchden, Dus Prince fier,
Soeckt Urede, dijn Hope op Gode bouwende,
Want den salichsten Uoorspoet is ter Węrelt hier,
Een vredelijck Leuen, in Godt betrouwende.
§ Eynde der Refereynen.
Beminde Broeders wilt Conste vseren,
Altijt tot Stichtinghe, en wilt wtroyeren
Ledicheyt, sy is moeder van alle quaet,
Laet de gaue tot Deucht in v domineren.
Aerdighe Dichte stelt, blameert gheenen Staet,
Eere, Lof, en Prijs bewijst Gode delicaet,
Reyn Rhetorijcke en wilt niet besmitten,
Op dat ghy meught den Staet van Eeren besitten.