§ Liedeken.
AEnhoort Syon mijn Bruyt,
Des Bruydegoms soet gheluyt,
Ontsluyt hem uwer deuren,
Ick brengh' v in dat Cruyt,
Mijn hooft is om v Uirtuyt
Uol Daus, en wilt niet treuren.
Mijn Bruyt heeft nu ghehoort
Haer Bruydegoms soet Accoort,
En d'woort // van haer beminden,
Sy is ghecomen voort,
Daer sy dede haer rappoort,
Waer sal ick hem gaen vinden.
Des s'nachts heeft sy ghesocht
Die haer Siele heeft ghecocht,
Ghebrocht // wt allen Sonden,
Metter Liefden ghewrocht,
Dat sijn Bruyt wel heeft bedocht,
Dus heeft sy hem gheuonden.
Compt mijn Uriendinne ient,
Om dat ghy mijn stemme kent:
Uoleynt // is swinters dwinghen,
Den Reghen is absent,
Die Bloemkens staen hier ontrent,
Den Somer doet voortbringhen.
De Tortelduyue goet,
Men hoort nu haer stemme vroet,
Zeer soet // hier inde Landen,
Den Uijgheboom behoet,
Dat hy sijn knopkens ontdoet,
Met reucken veelderhande.
Compt nu in mijn playsant,
By my wter Leeuwen tant,
Een Landt wordt v ghegheuen,
U Borstkens triumphant
Schoon bouen Wijn vaillant,
Compt wilt nu rustich leuen.
O Bruydegom mynioot,
Ghy die zijt wt ende root,
En groot // zijt ghy vercoren,
Ick lach in wederstoot,
Belast met d'eewighe Doot,
Ick ben deur v herboren.