§ Liedeken op de wijse,Ick wil my ghaen verheughen.
HOort al te gaet met Sinnen,
In dese Feest vergaert,
Die t'Corenbloemken minnen,
In Christo wel ghepaert,
Stout onveruaert //
Com ick tot deser Feesten,
Sy nu bewaert
Der Corenbloeme Gheesten.
Saul Coninck verheuen,
Machtich zeer wel bekant,
Temptatien in sijn Leuen
Uan Godt hem toe ghesant,
Uatet t'Uerstant,
De Gheest die dé hem beuen,
In hem gheplant,
Dé hem tot Quaetheyt sneuen.
Sijn Knechten dit aensiende,
Spraken zeer bout hem aen,
Heer Coninck hoort ons bewinde,
En wilt ons saen ontfaen,
Ghy zijt belaen
Met een verkeerden Gheeste,
Wilt ons verstaen,
Hy is van fellen keeste.
Heer doet nae onser Talen,
Doet soecken een Speelman goet,
Die speelt al met verhalen
Op edel Snaren soet,
Soo crijchdy moet,
Al om uws Gheests verlichten,
Soomen op Herpen doet,
Waer deur ghy vreucht muecht stichten:
Een Ionghelinck ionck van daghen
Sprack toe met haesten snel,
Hoort toe nae mijn ghewaghen,
Ick weet soo soeten Spel,
Dauid speelt wel
Isays Soon verheuen,
Uan Ramatha sel,
Hy is ootmoedich in leuen.
Saul doen hy dit hoorde,
Beual rasch sijnen Knecht,
Uaert wech als d'Onghestoorde,
Tot Isay gherecht,
Uan woorde te woorde,
Gaet seght hem wat ick meene,
Dat hy Dauid confoorde
Tot my ras seynde alleene.