§ Prince.
Christus wt Liefden door s'Uaders begheeren,
Naer t'schrifts vercleeren // daelde wt s'Uaders schoot,
En quam ons verlossen van s'vyants deeren,
Die altijt soeckt met subtijl affeeren,
Met schichten en speeren // ons te bringhen in noot,
Liefde bouen al hy ons sterckelijck gheboot,
Bemint malcanderen soo ick v beminne,
Wt Liefden hy ghestoruen is de bitter Doot,
Begrauen, verresen, tot onsen ghewinne:
Hier om seyt Ioannes met cloecken sinne,
Die sijn Broeder haet, op hem kijuende,
Ick segghe v waerachtich, nempt dit wel inne,
Die en heeft het Leuen in hem niet blijuende,
Maer inde Duysternisse is hy drijuende,
Dus blijckt hier by wel, alsoo ick meene,
Dat de Landen in Rusten houdt beclijuende,
Liefde tot Godt, en den Mensche reene.