§ Prince.
Ghy Princen ghebruyckt Wijsheyt in al v daden,
T'is des Heeren raden // sy sal v t'alder tijt
Uan alle Onruste der Landen ontladen:
Want haer rechte paden // zijn ghebenedijt,
In een quaetwillighe Siele soeckende strijt,
Oft in een Lichaem onderworpen der Sonden,
En sal de Wijsheyt niet woonen, des seker zijt,
Maer in die haer neerstich soecken t'allen stonden,
O Regenten der Landen, wilt dit deurgronden,
Wijsheyt ghebruycken, gherechticheyt stercken,
Dat Ruste wort in al v Landen gheuonden,
Ghy Ondersaten, wilt oock naer Wijsheyt hercken,
Zijt v Princen ghehoorsaem in alle wercken,
Godt leert Wijsheyt ghebruycken op dat wy souwen,
In Rusten sitten in allen Landen percken,
Dus tghebruyck der wijsheyt dits mijn ontvouwen,
Dat can de Landen in Rusten houwen.