§ Liedeken op de wijse,Schoon Liefken jent.
UAn Eerdt zijn wy ghemaeckt, Uan Deuchden zeer naeckt O Heer wilt ons ontfermen, Wy zijn al gheraeckt, T'is qualijck ghewaeckt, Ons Uyant nae ons haeckt,
Zeer wijdt is hy ghecaeckt, O Heer wilt ons beschermen.
Uerlaet nu dat quaet, Doet der Wijsheyt Raet Wildy in Ruste leuen, Dat Godlijck Saet Onsen Aduocaet, Troost en Toeverlaet, Compt tot onser baet, Hy en sal ons niet begheuen.
Sijn Rechtveerdicheyt goet Compt nu metter spoet Ons Cranckheyt te hulpen, Hebt goeden moet, Sijn Bloet zeer soet Heeft ons al behoet, Zijt dit wel vroet, Onsen commer sal hy stulpen.
Die Wijsheyt zeer claer, T'is heel openbaer, Sal hier met ons strijden, Al is ons pack swaer, En hebt gheenen vaer, Betrout al te gaer, Op ons Middelaer Hy sal ons beurijden.
Lieue Broeders hoort, Maeckt tsamen accoort,
Wilt Rust int Landt bringhen, Nae de Wijsheyt spoort, Rechtveerdicheyt doet voort, Zijdy Oost oft Noort, Leeft nae Godts Woort, En ghy sult Ruste vinghen.
Hier bouen int Lant, Daer eest zeer playsant By d'Wtvercoren kinderen, Al compt den Uyant Ontrent uwen cant, Als een sterck Gygant Hy een heeft gheen hant Die v can hinderen.
Och Edel Heeren, Wilt Wijsheyt leeren, En doet Rechtveerdicheyt Nae Godts begheeren Ootmoedich verkeeren, Sonder verzeeren Wilt Ureucht hanteeren, Nae uwer Eerweerdicheyt.
Prince Edel greyn, Uaedt nu dit certeyn Wilt Rechtveerdicheyt oorboren, Oft ghy valt onreyn, Dit is ghemeyn Int sondich pleyn Metten sotten Deyn Eewich blijfdy verloren.
Cookies on Poetry Cove