Refereynen ende liedekens

§ Liedeken op de wijse,Ick roep v O Hemelsche Uader aen.

AEnhoort al te samen mijn vermaen, Wat ick nu sal gaen beghinnen, Wilt dat Woordt Godts wel verstaen, Om te hooren daer nae gaen, Al die met Sonden zijn belaen, Soo meughdy troost ghewinnen.

Godt is bermhertich soomen siet, Ghelijck men mach wel aenschouwen, Die sijn Sonden wel deurwiet, Doet Penitentie sonder verdriet, Soo crijchdy Ghenade, en anders niet, En wordt van Godt behouwen.

Leest hoe Christus den Ghichtighen aensach Met Ooghen der Ghenadicheden, Heeft vertroost, soo Mattheus doet ghewach, Daer sy waren in swaren gheclach, En riepen nacht ende dach, Tot Godt met vierighe Ghebeden.

Noch vertroost hy Magdaleene in haren noot, Als sy was in svyants bandt gheterden, Ouer haer heeft ghethoont Liefde oirboort, En vergaf haer Misdaet bloot, Deur sijn Bermherticheyt groot, Alse in Berou van Sonden verherden.

Godt is ghenadich op dit termijn, Die in tijts van Sonden scheyden: Die in Quaetheyt blijft, soeckt Water voor Wijn, Om inder Hellen erfue te zijn: Dus maeckt v van Sonden reyn, Den Heere sal sijn Rijcke bereyden.

Christus is ghenadich, zijt dies wel vroet, Ghelijck wel is ghebleken, Hy gaf den Moordenaer deur Ghenade goet, Dat Paradijs: hier in crijcht moet.

Houdt op, Sonden niet meer en doet, Hy en sal ons niet versteken.

Compt tot my, alle die daer beladen zijt, Spreeckt den Heere der Heeren, Ick sal v verlichten met mijn Gherechticheyt, Die daer qualijck beraden leyt: Hoe de Węrelt v benijt, Wilt v tot Deuchden keeren.