Refereynen ende liedekens

§ Liedeken op de wijse,Ick erm Schaepken aen die groen heyde, Waer sal ick &c.

ERm Schaepkens van Christus Weyden, Waer wildy nu doch henen ghaen, Als de Landen, Uelden en heyden,

Ouer al in Onrusten staen? Blijft, helpt ons nu ontvouden Hoemen can met Waerheyt, Tot s'Menschen Salicheyt, De Landen in Rusten houden?

Godts Schaepherders int ghemeyne Neemt v Schaepkens in v behoet, Weydtse met Godts Woordt reyne, Laet niet stortten d'onnoosel Bloet: Oft schoon de woluen doen wouden, Soo moechdy nae Godts Woort, Cloeck helpen, soot behoort, De Landen in Rusten houden.

Ouerheyt van Dorpen en Steden, Diet t'Sweerdt der Iustitien draecht, Beschermt doch Christus Leden, Uan den ghenen diese plaecht: T'wordt v van God vergouden, En straft rechtveerdich t'Quaet, Soo suldy metter daet, De Landen in Rusten houden.

O Heeren, hooch van Rade, En ghy ander Raetslieden smal, Wilt altijt vroech en spade T'volck trouwelijck raden in al: Oock hoe sy voorspoedichst souden Den Ouerheyden groot Helpen, alst dede noot, De Landen in Rusten houden.

Alle vrij constighe Gheesten, Die den Prince nu Eere bewijst, En commen zijt ter Feesten, Int iugeren, de Waerheyt prijst. Laet Liefde niet vercouden, Maer deur Godts Woort ontsteckt, En elckelijck verweckt De Landen in Rusten te houden.

Ghy Lieden van alle Staten, Die diuersschen handel drijft, Zijt eendrachtich, tsal v baten, Onderdanich der Ouerheyt blijft, T'en sal v niet berouden: Maer bouen al, Ureest Godt: En leert wt sijn Ghebodt, De Landen in Rusten houden.

Ghy Boeuen, en ghy Fielen, En ghy Leechganghers vermomt, Diemen siet grof vernielen, Dwelck den Ermen alleen toecomt, En in ander Boosheyt verouden, Schudt wt v boose vel, Oft vertreckt, soo salmen wel, De Landen in Rusten houden.