§ Den Boeck. Bruessel. Deur Liefde vreest God.
SWerelts Regnatie wonderlijck nu gaet, Mits t'fenijnich gheslachte, want nu dat saet Houdt vast d'Ouerhandt bloot // Alle Landen vol Onrusten is, mits haet: Want Cain sijnen broeder Abel nu slaet Moordadich ter doot // Uol Bedrochs leeft nu een elck, cleyn en groot, Niet vreesende Godt, oft sijn Gheboden playsant, De Broederlijcke Liefde binnen swerelts cloot,
Is nu verdreuen, met Trouwe wt het Lant, De Waerheyt leght nu onder de voeten int sant, Hier om gaet de Werelt dus verdraeyt onsachtich: Maer leefde elck naer s'Heeren woordt aen elcken cant, De Landen souden in Rusten blijuen crachtich, Met peysselijcken Urede lieffelick eendrachtich, En Godts Gramschape soude blijuen onghestoort, Dus dat de Landen in Rust houdt is warachtich, Eendracht verciert met liefden vreesende Gods woort.
Eendracht verciert met Liefden omnipotent, Ureesende Godts Woordt met wercken diligent, Sonder ophouwen // Can de Landen in Rusten houden obedient, Met voorspoedighen Urede sonder torment, Onder Mans en Urouwen // Ghelijckt aen Iudith bleeck, die sonder verflouwen Godts Woordt vreesde, waer deur sy in ruste bracht Het Landt ront omme, mits haer vast betrouwen, Holofernes doodende inder nacht, Soo dat sijn Heyr opbrack met gheheelder macht, De vlucht nemende al t'samen ghemeene, Dit quam deur den Gheest Godts die hier in wracht Mits Godts Woordt vreesende met Liefden reene, Dus dat de Landen in Onrust houdt ghemeene Compt deur Houerdye, Nijdt en twistich Discoort, Maer dat de Landen in Ruste houdt is alleene Eendracht verciert met liefden vreesende Gods woort.
Och hoe vreuchdelijck ist en hoe iolijsselijck Daer die vreese Godts, is met Liefden wijsselijck,
Altijt gheduerich goet // Want sy verworpt die boosheyt afgrijsselijck, En brengt voort Ruste en urede prijsselijck In alle Landen soet // Maer daermen Godts woort niet en vreest, daer moet Godts thooren rijsen straffende die quade Met Plaghen menichfuldich in ouervloet, Ghelijck als hy dede sonder Ghenade Sodoma en Gomorra tot haerder schade, Met noch vijff Steden sondich int herderen: Merckt Coninck Pharao die met valscher dade Moysen vervolchde om te destrueren, Maer Godt heeft hen verlost van Pharaos tempteren, Mits Godts woort vreesende, dus is noch mijn rapoort, Dat de Landen in Rust houdt sonder cesseren, Eendracht verciert met liefden vreesende Godts woort.
Cookies on Poetry Cove