§ Ulissinghen in Zeelandt. Laet Schande berghen.
Broederlicke Broeders hoort mijn vermonden, Wy leuen onghehoorsamich heel in sonden, Waer deur den Heere is zeer ghestoort, Ongherustich worden ons landen bevonden, Deur d'Ongehoorsaemheyt van des Heeren woort, Laet ons hem gehoorsaem zijn met een accoort, Eyghen Erffenisse daer Melck en Honich vloeyt, Sal hy gheuen die houden sijn Gheboden voort, Rust en Urede dan deur onse landen groeyt, Uan gheen verstrickinghe in wort niemant vermoeyt Noch gheen sweerdt en salder deur ons lant gaen, Maer eest datmen sijn Gheboden verfoeyt, Dan salt ongherustich tot elcken cant staen, Ons vyanden sullen ons in dat sant slaen: Maer zijdy gehoorsaem, elck blijft onbenoudt, Om s'Menschen salich wesen eest mijn verstant saen, Godt gehoorsaem zijn, eest dat d'landt in rusten houdt.
Deur Ghehoorsaemheyt bewijst ons Schriftuere Dat Godt gheeft een Landt tot eewigher ure, En maect ons een volck bouen alle Natien, Zijn wy hem ghehoorsaem, soo statet pure, Hy bewaert ons van scandalisatien, En ghebenedijt ons in sijnder Gratien, Hy ghebenedijt ons landen metten vruchten, Ons Ossen en Schapen tot elcker spatien, Gaen wy wt oft in, wy en deruen niet duchten, Wy zijn ghebenedijt auont ende nuchten, Hy ghebenedijt ons met ouervloedicheyt: Zijn wy onghehoorsaem, t'is kermen en suchten, Wy sullen hebben alle Teghenspoedicheyt, Gheen Ghebenedijdinghe, al Weemoedicheyt, D'blijft al vermaledijt wat dat ghy boudt, Om s'Menschen salich wesen, en behoedicheyt, Godt gehoorsaem zijn, eest dat d'landt in rusten houdt.
Spreeckt die Heere niet tot Salomon openbaer, Houdt mijn Gheboden, ick seght v voorwaer, Den Stoel ws Rijckx die sal ick vermeeren, Maer zijdy my onghehoorsaem, ick seght v claer, Mijn Aensicht sal ick van v landen keeren: Uerliesen wy dan de Urede des Heeren, Wat sal ons anders dan Onruste gheschien: Laet ons gehoorsamich sijn Gheboden leeren, Soo hebdy Urede, nae Esaias bedien, Want hy vervloeckt de Ongehoorsamighe lien, En wilt sijnen Urede van henlien decken, Alle den vrolijcken sanck sal van hem vlien, De stemme des Bruydegoms sal vertrecken,
De landen sullen woest zijn t'allen plecken, Aldus zijt ghehoorsaem eer dat v beroudt, Ghehoorsaemheyt doet den slaep van sonden wecken Godt gehoorsaem zijn, eest dat d'landt in rusten houdt.
Cookies on Poetry Cove