§ Liedeken op de wijse,Reyn Liefde eerbaer.
O Lieflijckste Lief Leest desen brief, Tot gherief Uan v Minnaer onvroet, Ghy zijt die my Lief versuchten doet, Dus troost my Liefken goet, Laet v Liefde stralen in mijn Shertsen bloet, Och Lief gheboren, Sonder doren Uercoren Heb ick v troostken soet.
Schoon Lief verheuen, Wilt aencleuen Hoe t'leuen Mijn Liefde t'uwaerts brant, U Liefde doch in mijn herte plant, O Dochter elegant, Ick versoecke v wt Liefden, Lief playsant, O Maecht vol eeren, Wilt my leeren Uermeeren In v heylich Uerstant.
Edel Bloemken reene, Urij van Weene, Alleene
Ben ick Liefken benoost Tot v Lief is alle mijn propoost: Och Lief, oft ghy my coost, Tot uwen Bruydegom, roep ick, West en Oost, U Medecijne Sou mijn pijne Ten fijne Wesen den meesten Troost.
Puer maechdelijck greyn, Ghy zijt certeyn In dit pleyn Mijn wtvercoren Bruyt, Ick vervolghe v Lief, Noort en Suyt, Om v gherust Uirtuyt, T'ontfanghen Liefken met een Minlijck Saluyt: Want gheen meerder Ureucht, Uol alder Deucht, En verheucht Mijnder Sielen ghehuyt.
Bequaemste Urouwe Urij van Rouwe, Ghetrouwe Zijdy Lief excelent, U liefde Lief toch te mywaerts went, En in mijn Herte prent, Den troost der Ghenaden Liefken Reuerent Op dat ick gheheel
Mach voor mijn deel Int Prieel Dijns Uaders zijn bekent.
Mijn weerdtste Croone, Puer en schoone, Te Loone My toch v Liefde iont, U lieflijck Wesen heeft my deurwont, Wt vriendelijcken Gront Laet my eens cussen Lief, Dijnen rooden Mont, Op dat ick Lief mach Wt dit Gheclach Nacht en Dach By v rusten ghesont.
Och soetste Wesen, Hoochst ghepresen, Ghenesen Wilt met v Liefde my, Ick beminne v met herten vry, Dus Liefken wilde ghy Mijn hopende Troost suldy Maken bly: Laet my Uriendinne Tot Ghewinne, U Minne Doch eewich blijuen by.
Cookies on Poetry Cove