§ Liedeken op de wijse, Uenus der minnen Goddinne. &c.
OP v wil ick mijn God betrouwen,
U Beloften hebt ghy ghehouwen,
Op v Woordt wil ick bouwen,
Al sonder verflouwen.
Aensiet doch Heere verlost my, want
Ghy zijt mijn sterckheyt aen elcken cant,
U Goedtheyt zeer abondant
Streckt bouen mijn verstant.
Wanneer mijn vleeschs scheen van my te gaen
En dat ick met Cranckheyt was belaen,
Als ick scheen verdwijnen saen
Gaeft ghy my sterckheyt aen.
Hoe salich zijnse die daer woonen
In dijn Huys Heer niet om verschoonen
U Aenschijn wilt oock thoonen
My al sonder hoonen.
Ghy zijt mijn Beurcht, groot en sterck Casteel,
Op v O Godt betrouw'ick my heel,
Ghy zijt my een goet Iuweel,
Wel rieckende prieel.
Den Naem des Heeren wil ick prijsen,
En metter Herten eer bewijsen,
Ghy zijt die my can spijsen,
T'is een verjolijsen.
Bewaert mijn tonghe al met een slodt,
Dat ick ontfanghe een salich Lodt,
Anders waer ick weerdt bespodt,
Want t'is Niet sonder Godt.