Op de voys van’t Tucht-huys.
Schoon boven alle schoone,
Hoe maght gheschien?
Dat ghy dus hatigh ten toone,
Voor alle lien.
Dat ghy dus hanght ghenagelt
Vlack inden windt,
Bereghent en behaeghelt
Mijn liefste kindt.
Ghy die’t al hebt gheschapen,
Wat vremt bestier!
Hebdy gheen pleck om slapen,
Elders dan hier!
Waer magh u bedde wesen
Soo fraey beblomt,
Dat u bruyt uyt-ghelesen
Soo dickmael comt?
Wee my bedruckte Moeder,
Wee my ! wat raet?
Alst nu, o mijn behoeder,
Met u soo gaet!
Ach Simeon vol weerden
Ach, ach! o smert!
Nu gaen u seven sweerden
Dweersch door mijn hert.
Ha Cruys! zijt dan gheboghen
Op dat ick dus,
Die my dicks heeft ghesoghen,
Voor oorlof cuss’.
I.D.H.