Op de wijse: Wilder dan wilt wie sal my temmen. Wie wilt hooren ick sal beginnen Met luyder stemmen een nieuw liet:
Ick ben ontstelt soo seer van binnen, Mijn herteken lijdtr seer swaer verdriet. De wereldt heeft my soo leelijck bedroghen, Seer deerlijck ben ick van haer verleydt: Haer valsche wellusten heb ick gheploghen, In weelden gheleeft met vrolijckheydt. Den jonghen tijdt heb ick versleten In vele sonden soo menighfout: Mijns selfs heb ick seer dick vergeten, Het welck my uyt der herten seer rout. Mocht ick ten lesten noch troost verwerven, Soo waer mijn herteken wat ontlast: Ick vreese soo seer veur d’eeuwigh sterven, Want daghelijcx noch mijn cranckheydt wast. Wat batet my nu mijn bancketteren, En mijn hoveren nacht en dach: Braggeren en daer by triumpheren, ‘Twelck ick nu met recht verlaghen mach. Met Godts hulp sal ick voortaen bedwingen Mijn sinnen tot quaet altijdt gheneyght: Mijnen dranck wil ick met tranen minghen, Want my Godt den Heere seer heeft gedreyght. Maria schoon bloemken uyt Iesse ghesproten, Ghy zijt der sondaers toeverlaet: Ten heeft gheen menschen oyt verdroten, Dat sy u aen-nemen tot Advocaet. Maria Princersse seer hoogh ghepresen, Daer boven in ‘shemels firmament: Mijn ziele mach deur u worden ghenesen, En crijghen Godts gratie pertinent. Maria ghy zijt die suyver stede, Daer Iesus Godts Sone in heeft gherust: Deur u quam ons peys ende vrede, Deur u den twist wiert haest gheblust. Maria ick hoor’ u soo dickmael prijsen, Dat my verlanght by u te zijn:
Om u daer oock eer te bewijsen: Met alle de Enghelsche borghers fijn. Maria des hemels Coninginne Bidt uwen lieven sone veur my: Dat ick mach comen ten hemel binnen Daer alle de Engelkens zijn soo bly. F.G.S.B.
Cookies on Poetry Cove