Op de wijse: Noch weet ick ses lustighe hoeren.
Ghy Catholijcken allegader
Stiert u herten totten Heer,
Hy is den herder en bewaerder
Van u zielen swack en teer:
Hy heeft ghestelt
Sijn ziel in’t velt,
Om sijn schapen // ende knapen
Te verlossen met ghewelt.
Als sy verre verloren waren
Heeft hy-se minnelijck ghesocht,
Om in een koye te vergaren,
Op sijn schouderen ghebrocht.
Het viel hem swaer
En suer veurwaer,
Hy was vermoet // want water en bloet
Heeft hy ghesweet, ‘tis openbaer
Ons en sal hier niet ontbreken
Inde weyde daer hy ons voedt,
Als wy van sonden zijn gheweken,
En gheraeckt in sijn behoedt,
Sijn vleesch en bloet
Wt liefden soet
Tot spijs en dranck // sonder bedwanck,
Verleent ons desen heder goet.
Hy is bereet om ons te wijsen
Onsen padt ter saligheydt,
Met sijn exempel en advijsen
Die hy gheeft in deughtsaemheydt!
Als hy castijdt,
Zijt vry verblijdt,
Wilt niet claghen // want sijn slaghen
En gheschieden niet met nijdt.
Den Prins der herders hoogh ghepresen
Moeten wy alle volghen naer,
Hy sal ons beschermer wesen
Veur ons vyanden allegaer,
In ‘shemels pleyn
Sal hy certeyn
Ons gheleyden // met vermeyden,
Mint hem alle groot en cleyn.
F.G.S.B.