Op de wijse: Eens ick aensach, &c.
Comt Christen sielen inden gheest,
Minst en meest,
V Heere roept u met verlanghen:
Ter maeltijt daer sijn vleesch en bloedt,
Spijst en voedt
Al die hem begeert t’ontfanghen.
Soo ghy u kent in sonden quaet,
Die verlaet
Want niet besmet mach hem ghenaken:
V sonden by u niet vercleent,
Maer beweent,
Spreeckt u Bicht voor alle saken.
In u gheloov’ en twijfelt niet,
Als ghy siet
Des broots ghedaente voor uw’ ooghen:
‘Tis Christi Lichaem, na Godts woort,
Dat ghy hoort
Niemandt wort hier in bedroghen.
Merckt nu wel aen, o siel, wat goet
Godt u doet
Dus gaet tot hem niet sonder schromen:
En seght o Heer! dien ghy dus eert,
Is niet weert
Dat ghy in sijn huys sult comen.
De liefde voorts in u verweckt,
Die u treckt
Om te ontfaen den Heer’ der Heeren:
Ontsteeckt in u een soeten brandt,
’Tis den pandt,
Dat hy hem wt u wil keeren.
Finis.