Op de wijse: C’est pour vous belle dame. Hoe wel soo moet het lusten, Een hert dat dient met rusten, Den Heer der Heeren groot, Want waer ghy soeckt ghenuchten, Gheen blijschap sonder suchten, In deser werelt snoot. Wellust en can niet baten, ‘tGheselschap moet dy laten: Als ghy sult sterven ras, Courtiseren en wel praten, Pourmeneren lancx der straten En comt dan niet te pas. Den rijckdom en can niet staene, De schoonheydt moet vergaene In alsoo corten tijt: De doodt comt ons seer saene Cort is des levens baene Och Heer gheeft my respijt. Wy sterven sekerlijcke Wie wy zijn arm en rijck, Wy en weten tijdt noch stont, Dus raed’ ick yeghelijcke, Leert sterven gheestelijcke, Als ghy noch zijt ghesont. Ghy hertekens jonck van jaren Ick weet het sal u varen
Te derven de wereldt soet, Nochtans en laet niet varen Den moet, volght mijn verclaren Keert u tot Iesum goet. Hy sal u mildelijcke Hier naermaels maken rijcke Veur den arbeydt die ghy doet, En loonen eeuwichlijcke Daer boven in’t hemelrijcke, Met d’onverganckelijck goet. En volght niet die beminnen Verganckelijcke dinghen, En maecken al goet cier: Sy triumpheren en singhen, Sy danden en sy springhen, Sy hebben hun willeken hier. O lacen en wachermen Eer langh sy sullen kermen Als comt den lesten dach: Wilt Godt dan niet ontfermen Ter hellen sullen sy swermen, En roepen met groot gheclach. Godt gheve hem sijn ghenaden Remis van sijn misdaden, Die dit liedeken eerstmael sanck, Hy wilt u allen raden De wereldt te versmaden Ghy sullet hem weten danck. F.G.S.B.
Cookies on Poetry Cove