Op de wijse: Gheseghent zijn mijns liefs bruyn ooghen. O Maria fonteyne vol deughden, Wy eeren u met groote vreughden; Want ghy ons patronersse zijt, Alle gheslachten moeten u prijsen, En sonderlinghe eer bewijsen Godts lieve moeder ghebenedijt. Reyn onbevleckt // en suyver van sonden Zijt ghy perfeckt // een maghet ghevonden, Veur Godt eenen spieghel onbesmet: Daerom had hy in u behaeghen Die ghy met vreughden hebt ghedraghen In u maeghdelijck lichaem net. Ghy waert seer wijs om Godt te minnen Want u verstandt dat was van binnen Verlicht al met Godts gratie rijck. Voorsichtich waert ghy in u wercken; V groote wijsheydt mochtmen mercken Wt uwe woorden soberlijck. Ootmoedigh waert ghy uytghelesen, Als ghy u selven noemt te wesen Een dienstmaeght des Heeren schoon, Daerom zijt ghy met grooter weerden Seer hoogh verheven vander eerden Hier boven in des hemels troon. Gy hebt gelooft Godts woordt waerachtich, Deur u seer groot gheloove crachtich: Hierom zijt ghy saligh gheacht,
Want ghy en waert noyt twijfelachtich Dus heeft de Heere Godt Almachtich Sijn beloften in u volbracht. Ghy waert devoot in u ghebeden, Seer vierigh met ootmoedicheden Quamen sy veur Godts majesteyt: En in Godts wet te mediteren Waert ghy verlicht in ’t contempleren Met groote stille aendachticheyt. Seer ghehoorsaem in goede dinghen Waert ghy bequaem om te volbringhen Altoos den wille Godts perfect. Men hoorden u noyt murmureren, Niemandt en sach u rebelleren, V Overheydt waert ghy subiect. Ghy hebt bemint de armoede, Een slecht havijt, weynigh van goede, Soo diende ghy den Heere ghetrou: Want uwen Sone met deughden geperelt En hadde niet in dese werelt Daer hy sijn hooft op rusten sou. Verduldich waert ghy in u lijden, Ghy danckte Godt tot alle tijden In alle druck en teghenspoet Met vreughden hebt ghy’t al ontfanghen Als eenen schat met groot verlanghen Van de handen des Heeren soet. Seer godtvruchtich en goedertieren Waert ghy in alle u manieren Tot alle menschen arm en rijck; Om de bedroefde te vertroosten Te onderwijsen met goede propoosten Waert ghy seer soet en vriendelijck. Met grooten druck waert ghy bevanghen Doen ghy uwen lieven Soon saeght hanghen Vol wonden aen het cruyce bloot:
Hierom hebt ghy alle u daghen Inwendich in u herte ghedraghen Een gheestelijcke droefheydt groot.
Prince. Princersse reyn ons patronersse, Wy bidden weest ons veursprakersse By Iesum uwen Sone present: Dat hy ons hier gratie wilt gheven, Dat wy godtvruchtich moghen leven In dees thien deughden excellent. A.I.
Cookies on Poetry Cove