Op de wijse: Den tijdt is hier datmen sal vrolijck wesen. In’t nieuwe Iaer Wilt inden gheest verjeughden: Want hy comt ons naer Die ons vertroosten sal, Hy comt veurwaer Verciert met alle deughden, In armoede swaer Gheboren inden stal. Willecom met vreughden Is hy in d’aerdtsche dal, Die als nu besneden is Ten achsten dach die heden is, Betert u allegaer,, met desen nieuwen jaer. Compt alghemeyn Wie ghy zijt arm en rijcke, Groot ende cleyn, Tot Iesum onsen Heer Want hy sal certeyn Ons allen blijdelijcke Van ons gheweyn, Verlossen t’elcken keer,
Deur sijn bloedt alleyn Dat hy stort alsoo teer Ghy moghet tot hem vluchten // wel Ist dat ghy nu met vruchten // snel V betert allegaer,, met desen nieuwen jaer. Naer schrifts vermaen Den ouden mensch wilt laten En treckt vast aen Den nieuwen metter daet, In deught voortaen Wilt wassen t’uwer baten, Inde enghe baen, Haest u eert wort te laet. Mint Godt boven maten En wilt hem niet afgaen. Op hem u betrouwen mijn stelt Soo sult ghy oock behouden mijn ’tvelt Betert u allegaer,, met desen nieuwen jaer. Al ist dat wy Nu zijn van alle sijden, In dit ghety Omcinghelt met verdriet, Hy is naer by Die ons van al dit lijden Sal maken vry, Als hy’t gheraden siet: Sonder vermijden Doch sijnen wil gheschied’. Want wat sulcken Vader mijn doet ‘Tcomt uyt een goede ader mijn soet. Betert u allegaer,, met desen nieuwen jaer. Glorie zy hem Den Coninck hoogh verheven, Van Bethlehem, Die ons gheboren is Elck naer sijn stem
Wilt hooren en beleven, Elck sijn vlees tem En vlie des werelts dis, Om voortaen te leven In peys en vre ghewis, Wilt naer mijn sententie Deur rechte penitentie V beteren allegaer,, met desen nieuwen jaer.
Cookies on Poetry Cove