Op de wijse als’t beghint.
O schepper siet,
Hoe lustich is om wesen,
Daer ghy zijt ghepresen
Van d’Enghels inden throon:
Wilt ons toch hier
Van allen druck ghenesen,
Heere uytghelesen.
Gheeft naemaels sulcken loon:
Dat ick u aenschijn mach aenschouwen,
En u gheboden onderhouwen.
Heer Iesus soet
Gheeft ons dat eeuwich goet.Dat, etc.
Wie soud’ die vreucht
En blijdschap konnen schrijven,
Die sy daer bedrijven
In Sions schoone pleyn:
Sy zijn verheucht,
Om dat sy moghen blijven
En altijdts beklijven
By d’Lam Godts suyver greyn:
D’Lammeken doet open ten thoone
Den boeck met seven seghels schoone.Heer, etc.
Dees stadt eerbaer
Is schoone boven maten,
(Aenmerckt) want haer straten
Sijn van fijn gout planteyn:
D’Enghels aldaer
Met gulde wieroock vaten,
Loven sonder laten
Tot inder eeuwicheyt,
En prijsen Godt van hemelrijcke,
Met soete lof-sanck en musijck.Heer, etc.
Die duyster nacht
Sietmen daer niet regneren:
Altijdt triumpheren
Godts vrienden klaer en schoon:
Met groote kracht
Sietmense jubileren,
En sonder cesseren
Singhen met soeten toon:
Daer en ghebreeckt noch sonn’ noch mane
Noch ander licht by haer te stane.Heer, etc.
Prince minioot
Wilt u met vlijt op maken,
Bidden ende waken,
Op dese vrucht doch let:
Cleyn ende groot
Naer desen staet wilt haken,
Die daer in gheraken,
Moeten zijn onbesmet:
Sy zijn bekleedt met witte zijde,
Loven den Heer’ met herten blijdeHeer, etc.