Op de wijse: Hierusalem die schoone stadt.
O salich Heylich Betlehem,
Onder duysenden uytvercoren:
Vereert boven Hierusalem,
Want Iesus is in u gheboren.
O Bethleem cleyn groote stadt,
Cleyn van begrijp, maer groot van weerden;
Ghy zijt dat aldereelste vat,
En d’aller rijckste stadt der eerden.
Verheught u dan, o Israel,
Hoe machtm’ u blijder bootschap brenghen?
Tot u soo komt Emanuel,
Wilt uyt der sonden slaep ontspringhen.
O Coninck Christe, Prince groot
Hoe wordt ghy hier aldus ghevonden?
In hoy, in stroy, in sulcken noot,
In arme doeckxkens teer ghewonden.
Ghy hebt het firmament ghemaeckt,
Al waer u loven ‘shemels gheesten:
Maer nu gheheel bloot ende naeckt
Light ghy in’t midden vande beesten.
Ghy wort gheboren in den stal:
Niemant bekent in den nacht stille:
Maer d’Engheks singhen over al,
Peys zy den mensch van goeden wille.
O machtich Godt, o Iesu soet,
Wat liefd’ heeft u daer toe ghetrocken?
Dat ghy aenneemt ons vleesch en bloet,
Om ons tot u alsoo te locken.
Komt tot dit kindt ghy Adams kindt,
Hoe kondt ghy noch de werelt minnen?
Siet hoe Iesus hem met u bindt,
Offert hem heel hert en sinnen.