stem: C'est trop cruelle Ieux.
1. SAl deughdens-momme-schijn
Noch lang begraven zijn
O! mensch in u gemoet? die u betovert heeft,
Soo dat ghy willich nae haer wil en wetten leeft.
2. Royt nu den wortel uyt,
Eer datse veerder spruyt
In u verwildert hart, en sticht in u verstant,
Door vry-willige boet, een suyv're offerhant.
3. Want al het gheen ghy siet,
Is een sicht-bare niet;
Dat schielijck van u vlieght; gelijck de vlugghe wint,
En weer tot niet verdwijnt, so haest als het begint.
4. De gront, daer ghy op boudt,
Maeckt goede yver koudt;
Waer ghy door eygen waen, en met een domme kracht,
Het Hemelsch uyt de Aertsche borst te suygen tracht.
5. Helaes! verdoolde mensch,
Ghy soeckt u Ickheyts wensch,
En geeft de ruyme thoom aen t'ongebonden hart,
Dat nader-hant aen Satans reeckx gekluystert wart.
6. Ontwaeckt, ontwaeckt Sondaer
Nu in dit nieuwe Iaer,
En treckt het nieuwe kleedt van een nieu leven aen,
En gaet nae t'Oosten daer ghy t'helder licht siet staen:
7. Daer sult ghy in een kot
Vinden een mensch, u Godt,
Die in hem is geweest t'begin van aenbegin,
En nu een Maeght verkiest voor Moeder, en voor Min.
8. Soeckt hem die zijt belaen,
Hy wil u wel ontfaen;
Als ghy u boose wil wil-vaerdich thoomen wilt,
En boeten yvrich, t'gheen ghy quistich hebt ghespilt.
Liidt en Vermiidt.