op de voys: Si tanto gratiose. 1. ONtsluyt u doove ooren, Scheurt op 'tgesicht, door sond' verduystert Wilt niet o mensch versmooren In't quaet, daer in ghy lecht ghekluystert: Maer nu ontlast, u ziel die vast Leyt in des vyants stricken. Met groot beswaren, wilt u met s'hemels scharen Nu verquicken.
2. Wt 'sHemels hooghe salen Aen d'Herders slecht op't veldt beneden, De tyding neer quam dalen,
Die seer versuft bedeest van leden De blye maer, ontfinghen, daer Verlangt was na te vooren, Glory en eere, want d'alderhoochste Heere Is gheboren.
3. Dees maer heur niet deed schricken, Maer 'tlicht dat sy seer schielijck saghen Klaer door de wolcken blicken, Daer sy al sluymerich by haer kudden laghen: Maer nae't vermaen, zijn sy ghegaen Seer vlytich daer na soecken: Het welck sy vonden, in eenen kreb bewonden In de doecken.
4. Dit schijnt men wel te weten, Maer 'tsoecken met d'Herders spoedich Wert, laes! van ons vergheten, Het herte groots buycht niet kleynmoedich: Ons heersch ghemoet, eylacy doet De Liefd' uyt ons verdwynen, Die wy vervloecken, om salicheyt te soecken Wy niet yynen.
5. Maer soecken lust beslommert Nae ruyme wil graech uyt te kiesen, Niet eens zijnde bekommert
Het eeuwich door't verganckelijck te verliesen. O mensch ontsint, in sond' verblint, Ghy bereyt u selven De strick van plaghen, om u hier in te jaghen En te delven.
6. Prince snijt af de sonde, Verout niet langher in u boos volherden. Laet 'toude quaed ontbonden Door nuwe tijt en nuwe leven werden: De Heere al, de misdaet sal Door ons berou vergheven: Komt laet ons trachten, te bet'ren met gedachten, En met 'tleven 'tLyen verwint.
Cookies on Poetry Cove