Stemme: Lief uytvercoren, etc.
Van achtentachtich het nieuwe jaer
dat is warachtich, heel wonderbaer
Diet can gelooven, het sal geschien
Dat blinde doven hooren noch sien,
En tisser gheseyt dat menighe meyt
Sonder bescheyt sal nae een vryer vlien.
Dus weest vry vrolijc ghy knaepkens eel
Oft bent ghy een moolick, t’is even veel
Men sal u vryen, om’t groote goet,
En oock somtijen omhooghe moet
Dus hout u wat fris, t’geluck is onwis
Waer datse noch is, diet lach betalen moet
Wy consenteeren, de meyskens schu
Dat zijt met eeren, gaen vraghen nu
En moghen vryen, wie dat haer lust,
Wil hyt met lyen, dat sy hem kust
So blijft hy in schand, die onachtbaer quant
En vrijght int lant, geen lief die by hem rust
Princesse schoon, t’is nu u beurt
schenct hem de croone daert hart om treurt
Het moet doch wesen, dat men bemint,
Dus wilt niet vresen wie eerst begint,
De liefde en eer, verachtmen niet meer
Maer maecktse weer aen beyde zijden blint.