Stemme: Den tijdt is hier, etc.
Doet Martis eer, ghy die wilt staen en vechten
Ick haet te seer
Het campen met den hant, en die int meer
Of daer die schepen hechten,
Wendt u begeer, Neptuno triumphant
Eer ghy u Heer Ruyters met goet verstant
Doch wil ick Venus prijsen // u
Gaen Cupido bewysen // ru
Eer en lof doen rijsen // nu
Neerstich met offerhandt.
Dient dan ooc myn, als ickt u heb bewesen
In liefs aenschijn,
Laet my oock jonst ontfaen,
Lustich en fijn, werd’ ick dan wel genesen,
Clachte en pijn
Sal van my haestich gaen
Schiet u fenijn, diep in haers hertsen plaen
Op dat ick t’allen daghen // boet
Cryghe van die my claghen // doet
Hoope sal dan jaghen // Vroet
Terstont druck van die baen.
Soo sullen ist datse my // wil meenen
Vrolijck en bly // leven in groot gheneucht
Dat loof ick dy, ick sal u lof verlenen
dz ghy wel my, sult dancken voor myn deucht
Een beeltgen vry, wert van my toegeveucht
Dat sal ick t’uwer eeren, koen
Opt outaer te festeren, spoen
Wilt ghy nu myn begeeren // doen
Dat liefde na liefde peucht.
Princelijcke cracht // doet mijn Princesse buyghen
En haer ghedacht,
Den hemel niet belyen, op dat hart cracht
Gheenen goeden lust mocht suygen,
Maer dat myn clacht
Van haer wert aenghesien
Laet uwen schacht, tot in haer harte vlien
Soo sal ick fantasyen // veel
In my stellen tersyen // heel
Singhen met een blijen // keel
Vreucht sal van my gheschien.