op die voys: con ic de maneschijn
Ick schinckt, en brengt, uyt jonsten reene
Die sijnen Geest, nu aldermeest
In deucht, verheucht, also ick meene
Ontfangt in danc weest uz bevreest
wilt toch schromen gheen tempeest
Met malcander vrolijck weest
In deucht
Met eenen blyden gheest
Ongheneucht en maeckt ghen vreucht.
Desen dronckster, alhier, so wilt ontfangen
Zijt soet by dit gheselschap goet
Daer naer, voorwaer, staet alle mijn verlangen
V nu al meteen Sangher spoet
Laet druck zijn onder die voet
Hier niet dan gheneught en broet, In deucht
Met eenen blyden moet
Ongheneucht en maeckt gheen vreucht.
Set aen u mont, terstont, so wilt uyt drincken
Dat u die Waert te schincken spaert,
En laet te bet u keeltgen clincken
Om vreucht te quincken onvervaert
Saerom zijn wy hier vergaert
Malcanderen u jonst verclaert,
In deucht
Singt, springt druck van ons vaert,
Ongheneucht en maeckt gheen vreucht.
Ongeneucht en can ooc geen vreucht maken
Seer fijn, so zijn, ons saecken siet
Ist dz, noch wat, de waert met ons wil waken
Ick sal met laken zijn ghebiet
want hy ons te eeten hiet
En te drincken tis gheschiet
In deught
Singt, springt druck van ons vliet
Ongheneucht en maeckt gheen vreucht.