Stemme, V liefde quelt my tot in der doot.
Men plach eertijts door tloopen snel
Danssen en lustich singhen,
Doort dienen, smeecken, doort praten soet gherel,
Doort fraey en lieflijck lieghen,
Een moy meysken te bedrieghen.
Atalanta werdt doort loopen ras
Ghewonnen sonder claghen,
Doort praten, singhen, doort danssen op dit pas,
Crijcht menich zijn behaghen,
T’verdriet my noch niet te jaghen.
Leander heeft om Hero dick
Door Zee gheswommen vaerdich,
Verwondert u dat een persoon als ick,
Namelijck plomp, onaerdich,
Om u Lief gae dolen waerdich.
Mocht ick, als Iacob, u persoon,
Rachel verdiende winnen,
Gheen diensten swaer souden my dit loon
Zyn teghen myne sinnen,
Want u sal ick eewich minnen.
V wesen schoon myn hart behaeght,
V reden cloeck doet my hoopen,
Ghy sult my schincken, daer te om heb gejaeght,
En daer ick noch moet om loopem,
Want u trouw can ick niet coopen.
Veel gaven zou in u ghelijck
Pallas verstandt en reden,
ghy hebt veel schatten, en Venus suyverlijc
Heeft om so schoone leden
Voor Adonis dick ghebeden.
Dat haer behaechd’, heeft mijn verstand
Oock seer ghequelt doorgloedich,
Ic bid u Princesse, doet u dienaer bystant,
Toont nu u harte goedich,
End’ versacht myn lijden spoedich.
FINIS.