Op de wijse:Te Ceulen op den Rijn sprack ick mijn Liefken lest.
Ick brenghet hier een al na mijn sin
Ic wachtet gaern so veer als ict bin
Ick brenget hier een na mynen sin
Een vriendelijcke droncxken al van den claren,
Latet my comen ick hebbet soo garen
Gheluck daer mee en altijt wel te varen
Ick hebbet seer garen, garen, garen, garen
Dus latet my comen so veer als icket bin.
Tis u toegedocht uyt rechter min
Ick wachtet gaern so veer als icket bin
Tis u toegedocht uyt rechter min
Om vreughd en gheneughd te openbaren
Latet my comen ic hebbet so gaeren
Gheluck daer mee, etc.
Het sal u comen tot u ghewin
Ick wachtet gaeren so veer als icket bin
Het sal u comen tot u ghewin
Om dat ghy vreughd oock niet sult sparen
Latet my comen ick hebbet also garen
Gheluck daer mee, etc.
Prince.
Princes die kroesgen met wijn daer in
Ick wachtet gaarn so veer als icket bin
Prince dit kroesken met Wijn daer in
Suldy ontfanghen bly sonder beswaren
Latet my comen ick hebbet also garen
Gheluck daer mee en altijt wel te varen
Ic hebbet seer gaeren, gaeren, gaeren, gaeren
Dus latet my comen so veer als icket bin.