Op de wyse, Comt al ghy Venus dierkens.
Laet ons met blyde gheesten
Van herten vrolijck wesen
Op dat in desen feesten
Ghenoecht mach zijn gheresen
De Waert schenckt ons met desen
Den rijnschen coele wijn
Op dat wy sonder vreesen
Hier souden vrolijck zijn.
Maechden en Ionghelinghen
Thoont nu hier al ghelijcke
Met liedekens te singhen
den aert der Rethorijcke, het lieflijcke musijcke
Voecht so ghy meucht daer by
V jonst tot gonst laet blijcken
Al hier met harten bly
Wilt oock eens omme drincken
Om vreuchde te vermeeren
En elck een kusken schincken
V liefste lief ter eeren, tis Cupidoos begeeren
En Venus die hem riet
Ten sal oock niemant deeren
Alst eerlijcke gheschiet
Dees beker wilt aenvaten
Edel Princesse verheven
V Stein oock hooren laten
Om vreuchdelick te leven, tis u so voorgheschreven
Al hier tot deser stont,
Dies sal ick u noch gheven
Een kusken voor u mont.