Op de voyse: den lustelijcken Mey is nu ontdaen.
Waer sydy alderliefste lieff,
Die ick heb uytvercoren, comt te voren
Gy zijt die ic int hert verhief
Comt laet ons vreucht oorboren, druck versmoren,
Want het is nu de tijt, dat sich elc een verblijt
Den mey staet nu int groeyen
Wilt u tot vreuchde spoeyen // En in Lieffde bloeyen.
Bedrijft nu vreucht // dewijl ghy meucht
Aurora doet tlicht ontsprayen sonder bayen
Phoebo schoon claer met gheneucht
Sal ons ter feeste layen, en berayen
Alle vruchten suyver en net,
Flora chierlijck onbesmet,
Met haer cruydekens soet van roken
Heeftse voor ons ontloken, en gesproken
Comt al te hoeff die ter feest behoort
Men sal u wel ontfangen, met verlanghen
Met liefd’, vred’ en eendrachtich accoort,
Met musicale sangen, neemt u gangen
Acht ons beschimpers niet, maer die u jonste biet
Wilt hem liefde thoonen,
So sal u liefde croonen // en verschoonen.
T’sa op, comt voort de mey ontdoet,
Met al zijn groene bladen, om t’ontladen
En spreyt sich lustich metter spoet,
Comt dan ghy Venus saden, hier te raden
Hier verthoont int ghemeyn,
Menich lieff ghepaert greyn,
Die haer trou ghemeen maken
Om den Carel lieffd’ te smaken // Twist versaken