Op de wijse: Alst begint.
Die soete coele mey, is ons ontdaen
de bloemkens menigherley
So genoechelijcken staen,
Sy staen belaen, metten dou seer menichfout,
laet ons spanceren gaen, al in dat groene wout,
Die vogelkens ionck en out,
Sy maken groot gheluyt,
Alsoomen hier aenschout
Al in des meys firtuyt, want loover en cruyt
Staet seer playsant, dat wter aerden spruyt,
Is tijden mey gheplant
Dat uyt der aerden spruyt
Maect ons hier verheucht,
Neemt u lieffste Bruyt
en troostse als gy meucht,mz vrome deucht
Staet alle druc al vander hant
Al met solaes en vreucht
So is ons den mey gheplant
Laet ons de tafel doen decken
Capoenkens doen braden,
Yvoor ras doen lecken, dat is Venus raden,
Dat zijn de selfde zaden
Al van een roosenboom
Nu pluckt van Venus bladen
En draechter af gheenen roem.
Noch soecken wy practijcken
Van alle dese saken, dat is te Rethorijcken,
Te schermen of te schaken
Bancketten te maken,
Al na ons eygen appetijt,
dat zijn de selve saken, die Venus hier belijt