Op de wijse: La fille dun Advocaet ell’ fait la folie.
Vrijsters verblijt, soo ghy hier zijt,
by ons vreucht te vermeeren
u bid ic siet, versmaet ons nz
fari, lari, lette, van fan, la, fa, ladararan
Maer wilt u nu verneeren
Verneeren ras alst comt te pas, om te Bruyloft te comen,
Vrou Vuylen druyt, sal zijn de bruyt
fari, lari, lette, lan, fan, la, fa, ladararan
Dus comt doch sonder schromen.
Des Bruydegoms naem is bequaem,
Die heb ick heel vergheten
Maer pieter muyl, en ooc jan druyl, fray, etc.
Zijn speelnoots willent weten.
Al achter thoy, als puys soo moy sulduy de Bruyt sien prijcken,
Dan sullen daer van ons en haer, fray, etc.
Vier calveren musijcken.
Den coelen wijn, al uyt den rijn, drinctmer om vreucht beginnen,
Daer toe goet bier, dus maeckt goet chier
Fari, lari, lette, lan, fan, la, fa, ladararan
Dat hiet daer houdt u sinnen.
Braen pricken net, met uyen vet, en ael met langhe mooten
oock boecken fris, en goeye stocvis fray, etc.
Met vuystloock overgoten.
Maer talder best comt opt lest,
Een Candeel vanden clarfen
Wie hem dan moeyt dat hy best roeyt
Fari, lari, lette, lan, fan, la, fa, ladararan,
Die sal altijt me varen.
Den thienden Mey als bloeyt die kap
Ick wil u recht waerschouwen,
Int jaer voorleen, te ruymen reen, fray, etc.
Salmen dees feest houwen
Princesgen fijn, past hier te zijn, wy seggent u te veuren,
Wier niet en is, die crijcht de bris, fari, etc.
Of sal een coeck verbeuren.