Op de wijse: Comt al ghy Venus dieren.
Om nu te moghen uyten
Dat ick heb aengheheven
Dat ons de wijngaert spruyten
Seer mildelijck gheven
Daer wy vrolijck by leven, verheucht ons sinnen wel
Ick salt u liefken gheven
Tot voldoening vant spel
Als ghijt liefhebt ontfanghen
Volcht my als ick doe vooren
Voldoet ons met sanghen
Laet u clincker nu hooren
Om vreuchde te oorbooren
Alle treuren versmaet
Hebt ghy wat liefs vercoren
Hem nimmermeer verlaet
T’ghelt u mijn nabuerinne
Hier in dese contreye
T’gaet seer soetelijck inne
Tsmaeckt als een suyckereye
Als ick dit naten spreye
T’verheucht alle myn moet
Singt oock een Liedeken freye
Als uwen Schenckers doet
Princes dits u gheschoncken
En u jonstighe Heeren
T’is schoontgens uyt ghedroncken
Doet me tis mijn begeeren
Wilt my ten besten keeren
Het comt uyt shertsen gront
Lief dits tot uwer eeren, voor uwen rooder mont