Op de wyse: Wt liefden siet // lyd’ ick verdriet.
Ghy jonge meys // van Perus dans
Wilt u wachten en houwen,
Al ist nochtans // dat haren crans
seer schoon staet int aenschouwen.
Sy is seer loos // dobbel en boos,
Sy en can niet dan lieghen,
Haer soete voos // schout vry altoos,
Oft sy sal u bedrieghen.
Menich verdriet door hart gheschiet,
Sy brenghter veel in lyen,
wat sy u biet en acht het niet,
Wilt haer gheselschap myen.
Salmon goet // en David Vroet,
Sy zyn door haer bedroghen,
Iae Sampson moet // bekennen soet,
Dat sy hem heeft ghetoghen.
Door haer bedrijf // verloor zyn lijf
Troyins den troyane,
Door een Griecx Wijf // hoort myn motijf
most Troyens Rijck vergane.
Noyt man so sterc // die haer valsch werc
Hier oyt mocht resisteren,
Dus schout haer perc // t’sy Leet of Clerc
Oft ghy comt int verseeren.
Mijn goet vermaen // wilt doch ontfaen
In danck ghy jonghes innen,
wt liefden saen // soo ist ghedaen,
Dus wilt reyn jonst beminnen.