Stemme: Alst beghint.
O Roosken root // o peerle jent
liefken minjoot, daer ic on lijd torment
schoone Goddinne ic blijf geschent
Want myn lijden is sonder ent,
Nacht ende dach, doe ic gheclach voorwaer
Om dat ick scheyd’ van u, o maecht eerbaer
Moet ick nu scheyden. ist nu den tijt
Sonder verbeyden // ofte respijt
Mijn hart van droefheyt int lichaem splijt
Myn oochkens ick in stucken crijt
O scheyden fel, die my ghequel doet aen
K’en weet hoe dat icket sal connen bestaen
O wreede dach, ongeluckighe uer,
Dien ick oyt sach // ghy valt my so suer,
Want tdunckt my te zijn teghen natuer
Dat ick nu moet o maechdeken puer,
Segghen adieu op een nieu, tot u
O bittere doot waer na so beydy nu
Princesse schoone dit wel versint
Ghy spant die croone, en zijt bemint,
want ick ben niet ghelijck den wint,
Ghy staet altijt int harte gheprent
Ick sal ghetrou, o schoon kerssou, nu zijn
Al valt my t’scheyden also groote pijn.
FINIS.