Op de wijse: Het Nachtegaeltjen cleyne.
Den Mey seer schoont tot bloeyen
Verheucht de jonghe jeucht
Al door de paetgens groen
Dus elck wilt hem nu spoeyen
Vreucht maeckt vry met gheneucht
Wilt u Lief vrientschap doen
Door den Mey int saysoen
Passeert met melodye
Door die groene valey
Soeckt haer met herten blye
In desen coelen Mey.
Die een reyn Lief wilt minnen
Moet reyne Liefde vast
Int hert hebben gheplant
Soo mach hy troost ghewinnen
En myden alle last
Inden Mey seer playsant
Toont Lieft aen elcken kant
Soo wenschen wy u vrede
Sonder eenich gheschrey
Vryers en Vrysters mede
In desen coelen Mey
Dus ghy Venus scholieren
In desen groenen tijt
Wilt u Lief spreken aen
En met den Mey verchieren
Diemen nu breedt en wijt
Frayster ontloocken staen
En wilt pauseren gaen
Door die schoone landouwe
Met u Lief inde Wey
En schenckt haer dan u trouwe
In desen coelen Mey.
Ghy Princelijcke jeuchden
Aensiet den Mey die groeyt
Wilt const beminnen siet
En schenckt u Lief in deuchden
Door den Mey schoon ghebloeyt
Door liefden een nieu Liet
En schout alle verdriet
Rethorica wilt naren,
Op dat niemant en schey,
Wenscht vreucht het soet vergaren
In desen coelen Mey.