Op de wijse: Alst begint.
V liefde quelt my tot der doot
O edel schoon Goddinne,
Verlicht u dienaers lijden groot
Eer dat ick heel ontsinne
En vergae door u minne.
Eer ick u oyt met ooghen aensach
Maer van u hoorde spreken,
Dees heeft Venus den selven dach
My met u liefd’ ontsteken
Is niet liefken een groot teecken.
Hoecomt ghy Lief die om u gaet,
Zijn vleysch en bloet verteeren,
V troost onthouden vroech of laet
En u oock van hem keeren
Die u op eer gaet gheeren.
V eerbaer wesen schijnt lief niet
Te zijn so straf van natueren
Maer goedertier dus myn verdriet,
Wilt blussen al myn treuren
Of de doot sal ick besueren.
Prince.
Reyn suyver Princesse goet
Mocht ic kso gheluckich wesen,
V te cryghen so sou myn moet
Van veel drucx zijn ghenesen
Ontfermt myn lief door desen