Op de wijse: Alst begint.
In een groot ongeluc ben ic geboren,
Want fortuyn my rebelleert
Swaer gepeyns comt my te voren,
Waer deur mijn vreuchde declineert
Om absente is mijn versuchten
Ghy eerbaer maechdekens delicaet,
Want ick sorgh voor quade gheruchten
Die wel gheschieden door nijdt en haet
Hout u beloften gheschiet int scheyden
Van u en my, ghy weet wel waer
So sal ick hopende troost te verbeyden
Hoe wel een uer my dunckt een jaer.
Al mocht my Cresus schat ghebeuren
En Alexanders rijckdom groot,
Iae al des wereldts vreuchde kueren
Sonder u liefken t’waer my de doot.
Niemant can mijn gheest vermaken
Dan ghy o edel vrouwelijck graen
Om u alleen moet ickse versaken
Hoe rijck, hoe schoon, hoe wel ghedaen.
Nacht ende dach is myn bedencken
Ons diviseeren sonder pijn,
Twelck nu faelgeert en my gaet crencken
Dus weest ghenadich over my.
Eeuwighe vreucht sal ick ghenieten
Ist dat ghy myns ghenadich zijt,
Pijn noch arbeyt sal my verdrieten,
Ontfermt ghy mijner nu ter tijdt.
So sal Prince alle mijn rouwe
En dangier gheheel van my vlien
Dus blijft u dienaer in liefde ghetrouwe
En laet my troost als nu gheschien.