Op de voyse: Alst begint.
Schoon liefken jent, seer excellent
Ic moet het u clagen, dat ic absent
Van u dus sy ghewent
Dus lydt myn hart torment
Van daghe tot daghe.
Hoe dick hebben wy, met melody
Gheneucht bedreven,
Mijn hart was bly, als ic mocht comen by,
schoon liefken aen u sy, door u soet aencleven.
Ick roep o wach, met groot gheklach
Dat ickse moet derven,
Dien ick aensach, met myn oogen opslach,
Niet langher spreken en mach
My dunckt ick salt besterven.
Al so sy quaet, haer fier ghelaet
Cant al ghenesen,myn hart dat vaet
al waert heel desperaet, al door de soete praet
Die sy my heeft bewesen.
Waerom segt reyn, Lief edel greyn
Niet hebt ontfanghen
Mijn tru alleyn, die ick u boot so pleyn
Wt liefden int ghemeyn
Hebt laten verganghen.
Dat ick niet meer // mach comen weer
Dat doen qua tonghen // dies ick verteer
mijn hart in lijdenn seer, sy houden my ter neer
Als een kindeken bedwonghen.
Princesse comt voort // weest niet gestoort
wilt u doch keeren,naet soet accoort,
Schoon liefken u doch spoort
Onthout van my dit woort
In deuchden en in eeren.