Op de wijse: Wt Iessen is ghesproten een bloemken delicaet, etc.
Laat ons nu vrolijck wesen
Verblyden in dees feest
En singhen sonder vreesen
Een Lietghen uyt den Gheest,
Dus schinct, en drinct, en sinckt, vanden wijn
De Waart vanden haart, wil dat ghy sult zijn
Vrolijck lustich en fijn.
Die liefste wil ickt bringhen
Een kroesgen zoot zijn mach
Ick hoop sy salt ghehinghen
Alsoo sy voormaels plach
So claer, maer, als Christal oft Robijn,
So is hier ghewis, ey den dis, nu den Wijn
Ghewassen aen den Rijn.
Mijn liefste Lief ter eeren
Drinck ick dit kroesgen fier
Sy can haer wel gheneeren
Dat proper edel dier,
Nu weest onbedeest, en treckt al een lijn
V lust, hier toch binst, en kustet aenschijn
Van d’alderliefste dijn.
Princen laet ons bedancken
Die Waert die in vreucht groeyt
En voorts d’Englentiers rancken
En hem die in liefd bloeyt
In deucht, verheucht, met vreucht hier toch sinckt,
De Waart, vande haart, de wijn om nz schinct
Dus elck een kroesken drinckt.