Op de wyse, Geeft my te drincken nae mynen dorst, Ick sal u singhen, etc.
Ghy Vrijsters fier, in dit quartier
maeckt nu goet chier, t’mach u gebeuren,
Wy drincken bier, den wijn seer dier
Crijghen wy schier, dus wilt niet treuren,
Laet nu varen alle doleuren,
En brengt my eens, want ick versmacht
Daerom seg ic nu als te veuren:
Thoont jonste soet, uyt al u kracht.
Ic brengt u siet, doet wegh verdriet
Acht klappers niet tot ghenen stonden,
Hoort mijn bediet // een nieuwe Liedt,
Hoe dattet hiet, t’sy hier ontbonden
Daerom ben ick tot u ghesonden,
Laet ons vry wesen onbedacht,
Wilt het so wederom vermonden
Thoont jonste soet, uyt al u kracht.